a si nde mover .. b' istat ..!!

a si nde mover.. b' istat

^^^^^^^

Custa cantone de “mastru iseta”

L’ intendo dae cando minoreddu

Sos  mannos  naraian a  piseddu

Poned’ a banda e traza sa carreta

Como semidas dadas e faeddu

Postas che sun intr’ e sa cualeta

Si pessat a difender sa casceta

Chi costoit  timores de cherveddu

Onzi  disizu  cheret  su costu sou

Pro poder  su  frutu  saboriare

No bastat  de fagher   una promissa

pro narrer sa paltida l’ apo issa.

Si cheres  in sa vida  isperare

Bisonzat chi bi ponzas de su tou.

INNANT' 'E S'ISPRIGU--- (Paola Black .. Cambiganu)

INNANT' 'E S'ISPRIGU---

 Paola Black ·

S'isprigu solu mandat un'avvisu

de su chi ses e de su chi cumparis,

ah! meschinu cando no andant paris

s'imazine reflessa de su bisu

  

cun cussu ch'in intragnas b'est intrisu

ca de fungutu s'isprigu no piscat;

tando chie a si mirar' arriscat

biet petzi sas laras e su risu,

ma che corza chi cuat sa sementa

no s'ischit chi at a battire fruttu

o chi una 'orta in terra ruttu

sa vida dat a un'arbul' intrea,

fenas chi raighina no si leat

lassend'in terra cuss'estimenta...

Lussorio Cambiganu 

Cussa bisura chi s’ idet riflessa
Si notas ponet sa dresta a manca
Finas sa ruga s’ idet principessa
E ponet sas alas a cuss’ anca
Est sa fantasia, cust’ istessa
Chi vida dat et issa s’arrancat
Cando che torrat chin sos pes a terra
Finas s’ ispiju a biculos s’ isperrat

Paola Black --- 

Cando s'isprig' a biculos si segat
nacchi sunt sette annos de digrascia
e faghes vida meschina e bascia
ca sa sort' 'ogni cussolu ti negat,
peroe a chie fidele pregat
Deus già bi la faghet cussa grascia...
...sen' isprigu comente a s'iscuru
fenas su feu s' 'idet bellu puru!

Lussorio Cambiganu 

Duda non b’at chi onzi cosa bella
Est donu pro chie coglit su valore
Totu dipendet dae sa bon’ istella
Palatu fine e ojos de amore
Cando pienas donosa sa casella
De su sentidu .. chin fozas de fiore
Est tando chi totu bellu ti paret
Finzas si nudda che a tie alet

Paola Black 

Ma barzat o no barzat sa pessone
in custu mundu b'este ca b'at logu
solu cando morit biet su fogu
de s'iferru, nde biet sa presone
si fit malu; si nono cun resone
ca fit bonu l'iscansat cussu rogu...
...e de paradisu godit richesa
no ca fit campione de bellesa...

Lussorio Cambiganu

 Lassa pelder sa lana no est gai
No intro in pelcias de s’argumentu
Eo ti naro chi bellu est su cuntentu
De s’ azetare, no si pentire mai
Bellesa est pro chie istat atentu
Chena chilcare imbidi’ o guai
Godo dae manzanu a su sero
E in sa foltun’ e s’ ateru ispero.

Paola Black --

Ite fortuna chircas Cambiganu 
ca cussa no l'agattas in su loto
no est cos' 'e bi jogare, annoto,
cun sa sorte ch' 'onzunu at in manu
in s'argumentu andab' a pianu
cando chi ti cheres ponner in moto...
...mai paris nd'app' 'idu bell' e bonu
campanas chi no dant matessi sonu...

Lussorio Cambiganu 

Sempre sonat custa filastrocca
Chi narat: “bellu andat chin su macu”
Ma est ca de feonzu nd’ est istracu
E coro e mente gighet che sa rocca
Tiat esser ora de ponner abbacu
Pro si leare cussu chi li toccat
Si bellu no at meritu perunu
S’ imbidia no la chilcat nisciunu

alla finestra

alla finestra…

Se le tue mani allunghi alla finestra
ora che i vetri bagnati son di fuor,
puoi disegnare col dito alla tua destra
quanta dolcezza provi col tuo cuor.

Poiché lo strusci, ti par d’ udir l’orchestra
che suona immensa la sinfonia d’ amor,
senti la pioggia che batte sopra il tetto
così come ti batte il cuore in petto.

‘Si tanti desideri consumati
quanti piaceri che non ritornan più,
tutti li hai visti..anche se son passati
come gli stormi che volano lassù.

Respiri e tieni nei sogni ed i contatti
quanto di meglio sai poi donare tu
a chi di vita lo chiami prediletto
immerso nel sorriso e nell’ affetto-

durgalesa

durgalesa

sos versos già frommados in donz’ era
dae mannos e minores pro bellesa
Si miscian a su sole e- a s’ aera
Pro los porrire a tie durgalesa

Sa terra ‘e sa Sardigna nd’ est fiera
De t’ aer prenda e fiza ben’ atesa
Gai comente brillan ojos tuos
T’ isperiet fadu ‘eretu chin sos suos.

eo su chi a tie poto dare
este custu soneto  ' e meravitza
mi pienas d' urgogliu d' esser sardu

e tando a tie porro cust' azardu
comente cara e amada fitza
ti naro: "bella a t' abbaidare"  

Masala (nella foto) Zizi e Pazzola

Masala, Zizi e Pazzola

In  Pattada  (annos ‘’60/70”

Sa festa fit tando una sola

Sa die de sa santa amparadora

Sa pultascione ,  cadderis  chi colan

Chin  sos costumes e sas banderas fora

A sero  Zizi, Masal’ e Pazzola

In  poesia faghian passare s’ora

Su comitadu lis  porriat su tema

E  paj’ e oras  muntenian s’ iscena.

sa demograzia tiranna

Demograzia  tiranna

“Totu est male e peus   benzende”

 s’ intendet   lamentela  sola,

Su populu  annicadu e frastimende

cuntra sa casta chi no nde  ‘ogat tzola.

“S’ antipolitica  est  male naschende”

Naran  sos comundantes de s’ iscola,

de cuss’ iscola  chi  at totu insinzadu

d’ istare mudu, corrudu e fustigadu.

Cantas isperas, disizos giovaniles

brujados  dae  sa classe dirigente,

cossizeris chi biven in porchiles

dezidin  su destinu de sa zente.

In Parlamentu  sun  nessi  chentu viles

pessighidos  pro fatos indezente,

in sas regiones  ‘etana  tot’ in cue

che a  porcheddos chi si suen sa sue.

Ateros tempos  post’in  poesia

At Mann’ e Uthieri e deit  s’ avvisu:

a  sos barones pro si procurare

‘e  moderare  cussa  tirannia.

Como nos lean  a  beff’ e a  risu

si  ’inie  sighin  alu  a    pasare.

fozas

Sa foza

S’ arvure  oe peldet una foza

sa nae   no  nde sentit  pius pesu,

la dat a su terrinu,  issa s’spozat

e chin cuntentu faghet su resu.

 Tempus   passat a bona o mala oza

e custu est bene chi siat cumpresu:

“onz’ annu  chi che passat  in sa vida

est una  foza chi a terra est arrivida”

Cando   pasat  subr’ e su terrinu

pedit  su pelmissu  ‘e si colcare,

pustis  dimanda  faghet su vicinu:

“occanno a tie deviat toccare?”

Annu passadu  apo fatu s’ inchinu

a sos  ch’ innoghe mi faghen  ‘istare ,

fozas  faladas  e frutos    saidados

zeltos   sun bios, ateros   frazigados.

Terrinu, chin 'elmes  e raighinas

la toccan e chin grabbu  li naran:

“Como  conto de sas bonas fainas

 sa vida  noa ch’ innoghe s’ imparat.

Totu che falat  in sas istentinas

o sas  intragnas de custa terra cara,

pustis  impar’ a semene de nou

torrat a vida  onz’ elementu tou”.

lagrimas.. suore e sambene (Pintore, Cambiganu, Deiana)

Giuseppe Pintore

Pro cantu so deo su promotore,
cheria ponnere unu tema nou.
Chi tenides sa musas in favore,
est'ora e bos ponnere a su prou.
Sa cale sambene lagrima e suore,

chie chere sebere su tema sou.
Deo no isco chi apo sorte mala,
isetende a bois m'isto a un'ala.

Lussorio Cambiganu 

Tres elementos chi sa natura dada
As postu in su banc’ e sa disfida
De tribulia e gosos est signada
Siat de piantu e risos custa vida
De sambene sa vida alimentada
Lagrimas issa ilfunden chie l’ at bida
Totu si tratat de bellu e de dolore
Pro custu naro ch’ ischirrio suore

Manuel Deiana 

su suor'e tribagliu su segnale

de fadiga e de anzi sforzu vanu

e de sa vida jiai in tempus lontanu

sa lagrima iscurre pro su male

invetzas da chi est cosa naturale

su sambene este su motu umanu

chi siat menzus su sambeme creo

pro cussu in custa gara mi lu leo

Giuseppe Pintore *

Su piantu a mie no m'es consolu
epuru in sas fadigas es presente.
Si pianghet cando bi e su dolu
e pianghet su pitzinnu innotzente.
Su sambene in sas venas currente
es vida es fortza ma si bat oriolu
cun sa lagrima ch'in s'oju s'imprimidi
chi patidi o s'es cuntetu esprimidi.

Lussorio Cambiganu 

Su samben’ e sa lagrim’e amore
Sun dados dae su bonu sentimentu
Podet esser finas de patimentu
Cand’ odiu lu ‘oltat in dolore
No esistit perunu pentimentu
D' aer ilfustu sa pedde 'e suore
Che su lentore ilfriscat sa fotza
e bogat machine e mala ‘otza.

Manuel Deiana

 sa forza in su tribagliu mattutinu

ischis ca est dae su sambene meu

.ti da sa forza in s ora e su recreu

si de su lettu intras in terinu

so importante e de determinu

s omine senza megus no ista reu

pro chi fadigas e emoziones jambene

cumanda sempre su meu sambene...

 Giuseppe Pintore *

Cando valana sa lagrimas a rios,
chi parene lagrimas de madonna.
Chi b'a pena finzes chi ti sonna
ses dromidu e panghes a ojo bios.
Ca su piantu e sempre sa colonna
de sos penseris sos pius proibios.
proite es solu in su piantu
de su caratere chi s'idet s'ispantu.

Lussorio Cambiganu

 It’ est oe s’ impolt’ e su suore?
Chin cal’ aficu si alciat su manzanu?
Abberu est dovere et unore
De fagher che a bonu cristianu?
Totu misciadu gosu e dolore
De visciu malu e santu Bustianu
Como cal’ est su cabu de sa vida 
.. o nessi a cale coa est arrivida?

Manuel Deiana 

deo creo a su mio e bos naro

ca su samben de corpu est motore

ca scurre sempre non che su suore

da sa sustanza de valore raro

e pro canto unu siat avaro

de risparmiare inie non faghe errore

si risparmia in suore e piantos

.ma risparmiare samben non dat bantos

Giuseppe Pintore *

Osselvade unu pitzinnu innotzente
apena nschidu chi nudda cumprendet.
Pianghet cando chi es sufferente
e pianghet chi a mandigare pretendet
cun sa lagrima ancora si difendet
ca es sa prima peraula tzeltamente.
Ca cun su piantu pone su motu
es cun su piantu chi narat totu.

Lussorio Cambiganu 

suore chi nde pesat sos muros
chi messat trigu e zapat sa terra
est isse chi in sos mamentos duros
nos dat a manigare in paghe e gherra
suore curret in rios sicos iscuros
pro ilfunder sicas chelvas de terra
tantu est isse ricu ‘e dignidade
chi rendet pius digna umanidade

Manuel Deiana

 si de famiglia tenides onore

si una femina jughides a fiancu

si torrades istraccos e in suore

cun su pitzinnu pianghinde a fiancu

ca privados los an de sos valore(s)

de sa venditta non faghide a mancu.

cun samben frittu giustu chi ripaghes

ca cun su suore e piantu no lu faghes

Giuseppe Pintore *

S'omine est errante e vagabundu,
siat in tribagliu che in amore.
Sa terra la gira totu in tundu,
e versat tanto litros de suore.
Chi sambene versat es moribundu,
e tando si pianghet su dolore.
Sa lagrima es timbru e totu cantu,
sinnalat su patire in su piantu.

Paolo Cusinu

 Eo puru acudo assa funzione
e a su sambene do un azzudu
prite non potzo piusu istare mudu
tottu fachide vene attenzione
ca de su sambene sa trasfusione
ti lu torrat a intro che imbudu
si di mancat li piccas su sapore
gasi no sunu lacrima e suore...

Lussorio Cambiganu 

Etando a Cusinu porro unore
Ca paret chi pedat in umilesa
Narat chi lu cheret pro favore
E at immentigadu sa pretesa
Canta pro me su lustru a su suore
E chilca de li dare nobilesa
Eo pestantu da’ innoghe mi ghiro
E bos saludo e como mi retiro